幼潛第九堂

今日幼潛第九堂, 即係所有學習嘅最後一堂, 下堂便要進行評估, 就可以攞番張証書, 正式完成是次課程

尤記得第一堂郭 ee 講過最後評估果日會用之前果 d 遊戲考小朋友, 大約會考三個遊戲, 睇下佢學咗幾多, 亦可以從中睇下家長有冇在家中練習, 懶惰 mama 當然乜都無做 la, 嘻~ 嘻~ 唔知彤彤下次會唔會 "肥佬" 呢 ?

今日第一個遊戲係坐吹氣小 sofa, 叫小朋友名字, 然後等佢自己爬上去, 轉身, 然後郭 ee 一邊輕輕力左右搖擺小 sofa, 一邊唱 "小司機" 歌

"我是一個小司機... 小司機... 小司機..."
"我是一個小司機... 開車 boot boot boot..."

好多小朋友平日最 "耍家" 嘅擒 sofa 技倆份份出籠, 可以話係 show time 時間, 咪睇彤彤平日斯斯文文, 佢都會間唔中擒 sofa, 呢次都難唔到佢, 佢經過觀察兩位小朋友玩之後, 佢好主動行出嚟等 ee 叫佢個名, 仲唔怕 ee 搖擺小 sofa, 又過了一關 !! 呢個遊戲主要係訓練小朋友平衡力

郭 ee 話因內耳 "前庭神經"系統是維持人體平衡功能的主系統, 如果發展唔好, 小朋友行路會冇咁好, 例如行直線會唔穩定, 如果及早發現可以治療

第二個遊戲係認圖畫辨別唔同日常生活嘅活動, 例如 : 食, 飲, 跑, 跳繩, 游水, sir 滑梯, 劃畫, 踏單車, etc. 家長每次選擇兩幅圖畫, 各自同小朋友講一次, 再加上大動作加深小朋友記憶, 然後攞出圖畫, 問小朋友邊樣係 xx (e.g. 游水), 彤彤似乎對記憶遊戲份外偏愛, 郭 ee 做示範時已經手指指, 又比佢認得晒 d 圖畫, 嚇了 mama 一跳

第三個遊戲係玩彩虹降落傘, 所有小朋友圍圈, 每位小朋友揸住彩虹傘嘅小圈, 再跟住郭 ee 指示 up and down, 希望大家合作令彩虹傘向上向下擺動, 彤彤對於聽指令都算唔錯, follow 到 ee 嘅指示, 跟住就幣 la, ee 要小朋友瞓在彩虹傘上面, 而 mama 繼續上下擺動個傘, 雖然彤彤肯瞓低, 但一擺個傘, 佢就驚到喊, 跟住要 "捐" 落個傘下面, 佢全程 "cool" 住 mama 又喊又驚, 我個女都係 "細膽鬼" 嚟o架~~

呢個遊戲訓練大家合作, 雖然彤彤後尾果 part 喊晒, 但 ee 讚佢係八位小朋友中能夠 follow ee 指示同大家合作嘅其中四位, mama 都個心都安慰 d, 其實彤彤宜家可以玩 "捐"山窿, 可以比 blanket 蓋頭, 已經叫做進步不少 la

同八位小朋友相處咗一段日子, 當中翹翹係比較叻叻嘅一個, 可能係同佢之前參加過幼潛有關, 佢好似小班長, 每次都會幫手收拾東西, 語言方面又叻, 已經可以像鸚鵡般 copycat ee d 說話, 唯獨 d 性格比較獨立, 成日唔聽佢 mama 之笛, 不過唔知係咪個個小朋友都蝦 mama, 眼見 papa 上堂時, d 小朋友都比較聽話, 可惜老公唔肯試下同 baby 上堂 la =(

彤彤同翹翹分享緊雞蛋仔 =)